1 mart 2025-ci il tarixində vergi və mühasibatlıq sahəsindəki ən son yenilikləri və strateji inkişafları müzakirə etmək məqsədilə keçirilən 3-cü Vergi və Mühasibatlıq Zirvəsi çərçivəsində Maliyyə Monitorinqi Xidməti nümayəndəsi spiker qismində iştirak edib.
Zirvənin Maliyyə və Uçot panelində Xidmətin Əməkdaşlıq Departamentinin direktoru Fuad Əliyev çıxış edib. Fuad Əliyev maliyyə cinayətlərinin və qanunsuz maliyyə fəaliyyətlərinin qarşısının alınmasına həsr olunmuş paneldə cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsi ilə mübarizə (ƏL/TMM) sahəsində mövcud yanaşmalar və tətbiq edilən metodlar barədə iştirakçılardan gələn suallara cavab verərək, ölkədə maliyyə cinayətlərinin qarşısının alınması üzrə dövlətin apardığı fəaliyyətləri barədə dinləyiciləri məlumatlandırıb.
Spiker komplayens (uyğunluq) çərçivəsinin qurulmasının vacibliyini vurğulayıb və şirkətlərin müvafiq riskləri idarə etmək, hüquqi öhdəlikləri yerinə yetirmək üçün xüsusi siyasət və prosedurlar tətbiq etməsinin əhəmiyyətini qeyd edib. Hədəfli maliyyə sanksiyalarının, xüsusən də terrorçuluğun maliyyələşdirilməsinin qarşısını almaq üçün müvafiq tədbirlərin görülməsinin zəruriliyinə diqqət çəkərək, bizneslərin bu barədə məlumatlı olmalarının vacib olduğunu bildirib.
Fuad Əliyev həmçinin, biznes dürüstlüyü ilə ƏL/TMM arasında sıx əlaqənin olduğunu və yalnız dürüstlük prinsipinə əsaslanan işgüzar fəaliyyətin hüquqi və maliyyə cəhətdən təhlükəsiz olduğunu vurğuladı.
Nəhayət, Maliyyə Monitorinqi Xidməti ilə özəl sektor arasında tərəfdaşlığın, məlumat mübadiləsi və təcrübə paylaşımı yolu ilə daha effektiv şəkildə həyata keçirilə biləcəyini qeyd etdi.
Bu tədbir, iştirakçılara maliyyə cinayətlərinin qarşısının alınması sahəsindəki ən son yanaşmalar və metodologiyalar barədə məlumatlı olmağa, həmçinin iş dünyasında dürüstlük və uyğunluq anlayışını daha da gücləndirməyə imkan verdi.
