MMX Azərbaycanda ƏL/TMM məqsədi ilə bir sıra hökumət qurumları/dövlət orqanları ilə sıx əməkdaşlıq edir.

Maliyyə kəşfiyyatı və şübhəli əməliyyatlara dair məlumatların müvafiq dövlət orqanları arasında mübadiləsi ölkəmizdə ƏL/TMM mənzərəsinin yaxşılaşdırılmasına əhəmiyyətli töhfə verir, cinayət fəaliyyətini aşkarlamaq və qarşısını almaqda yardımçı olur. Bu tərəfdaşlıq nəticəsində MMX milli təhlükəsizliyi və iqtisadi sistemi müvafiq dövlət orqanları/qurumları ilə birlikdə gücləndirməyə çalışır.

Belə ki, MMX üçün ƏL/TMM üzrə aidiyyəti dövlət orqanları arasında qarşılıqlı və səmərəli əməkdaşlığın təmin edilməsi və müxtəlif sahələri əhatə edən fəaliyyətlərin əlaqələndirilməsi ön planda dayanır.

ƏL/TMM sahəsində fəaliyyət göstərən orqanlar arasında əməkdaşlıq müvafiq normativ hüquqi aktlar əsasında təmin olunur. Əməkdaşlığın əsas istiqamətləri kimi ƏL/TMM sahəsində (i) qarşılıqlı informasiya mübadiləsi; (ii)məlumat bazalarından birgə istifadənin təmin edilməsi; (iii) hüquqi yardım sorğularının cavablandırılması; (iv) birgə tədqiqatların aparılması, analitik və metodiki materialların hazırlanması; (v) normativ xarakterli aktların birgə hazırlanması; (vi) konfransların, seminarların və təlimlərin təşkili üzrə tədbirlərin həyata keçirilməsini əhatə edir.

Ölkədaxili əməkdaşlıq, həmçinin Azərbaycan Respublikasının Korrupsiyaya qarşı mübarizə üzrə Komissiyası və cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sisteminin ölkə risk qiymətləndirilməsi üzrə cinayət yolu ilə əldə edilmiş əmlakın leqallaşdırılmasına, terrorçuluğun maliyyələşdirilməsinə, kütləvi qırğın silahlarının yayılmasına və yayılmasının maliyyələşdirilməsinə qarşı mübarizə sahəsində Koordinasiya Şurası çərçivəsində müvafiq qaydada aparılır.

Azərbaycan Respublikasının müvafiq qanunvericiliyinə əsasən, MMX ilə qarşılıqlı əlaqədə fəaliyyət göstərən aidiyyəti orqanlar aşağıdakılardır: 

 

Nəzarət orqanları	İqtisadiyyat Nazirliyi yanında Dövlət Vergi Xidməti  Mərkəzi Bank  Ədliyyə Nazirliyi  Dini Qurumlarla İş üzrə Dövlət Komitəsi  Auditorlar Palatası  Vəkillər Kollegiyası
Hüquq-mühafizə orqanları	Baş Prokurorluq  Daxili İşlər Nazirliyi  Dövlət Təhlükəsizliyi Xidməti  İqtisadiyyat Nazirliyi yanında Dövlət Vergi Xidməti  Dövlət Gömrük Komitəsi

 

2023-cü ildə Maliyyə Monitorinqi Xidməti ölkədaxili əməkdaşlığın möhkəmləndirilməsi məqsədilə Azərbaycan Respublikası Baş Prokuroru yanında Korrupsiyaya qarşı Mübarizə Baş İdarəsi, Dövlət Təhlükəsizliyi Xidməti, Daxili İşlər Nazirliyi, İqtisadiyyat Nazirliyi yanında Dövlət Vergi Xidməti, Auditorlar Palatası və Vəkillər Kollegiyası ilə anlaşma memorandumları imzalanmışdır.